ತೇರ್ಸ್ ವಾಂಜೆಲಾಂತ್

ಸಬರ್ ಪಾವ್ಟಿಂ, ಥೊಡಿಂ ಅಮ್ಕಾಂ ಸವಾಲ್ ಕರ್ನ್ ಅಸಾತ್; ಕೀ, "ಮರಿಯೆ ಕಡೆನ್ ಕಿತ್ಯಾಕ್ ಮಾಗ್ಚೆ?". ನಾ, ಅಮಿಂ ಮರಿಯೆ ಕಡೆನ್ ಮಾಗನಾಂವ್; ಪೂಣ್ ತಿಚೆ ಕಡೆನ್ ಅಮಿಂ ವಿನಂತಿ ಕರ್ತಾಂವ್ ಮಾತ್ರ್. ಜಾಕೊಬಾಚೆ ಪತ್ರ್ ಮ್ಹುಣ್ತಾ, "ಬರ್ಯಾ ಮನ್ಸ್ಯಾನ್ ಕೆಲ್ಲೆಂ ಮಾಗ್ಣೆಂ ಸಕ್ತಿವಂತ್ ಅನಿಂ ಫಳಾಧಿಕ್" (ಜಾಕೊಬಾಚೆ ಪತ್ರ್ 5:16). ಮರಿ ಜಾವ್ನಾಸಾ ಸೊಮಿಯಾಚಿ ಅವಯ್. ದೇವ್-ಪುತಾಕ್ ತಿಣೆಂ ನೋವ್ ಮಹಿನೆಂ ವಾವೆಯ್ಲಿ ತಿ ತಬರ್ನಕಲ್. ಅಶೆಂ ಅಸ್ತಾ ತಿ ಭಾಗೆವಂತ್, ನಿತಳ್ ಅನಿಂ ಬರಿ ಮನಿಸ್. ದೆಕುನ್ ತಿಚೆ ಮಾಗ್ಣೆಂ ಫಳಾಧಿಕ್.

ತಿತ್ಲ್ಯಾಕೀಯ್ ತೇರ್ಸಾಚಾ ಮಾಗ್ಣ್ಯಾಂತ್ ಅಮಿಂ ಕಿತೆಂ ಮ್ಹುಣ್ತಾಂವ್?, ವಾಂಜೆಲಾಂತ್ ಅಸ್ಲೆಂಚ್ ಅಮಿಂ ಪುನರಾವರ್ತನ್ ಕರ್ತಾಂವ್. 

ಕಶೆಂ?

ಬಾಪಾಚೆ, ಪುತಾಚೆ ಅನಿಂ ಪವಿತ್ರ್ ಅತ್ಮ್ಯಾಚೆ ನಾಂವಿ, ಅಮೆನ್. - ತ್ರಿಂದಾದಿಕ್ ಮಾನ್; ಹಾಚ್ಯಾ ವಿಶ್ಯಾಂತ್ ಪವಿತ್ರ್ ಪುಸ್ತಕಾಂತ್ ಜಾಯ್ತೆ ಬರವ್ನ್ ಅಸಾ.

ಉಪ್ರಾಂತ್ ಯೆತಾ ಅಮ್ಚಾ ಬಾಪಾಚೆ ಮಾಗ್ಣೆಂ, ತೆಂ ಸೊಮಿಯಾಚೆಂ ಮಾಗ್ಣೆಂ.

ಅಮ್ಚಾ ಬಾಪಾ ಸರ್ಗಿಂಚಾ, 
ತುಜೆಂ ನಾಂವ್ ಪವಿತ್ರ್ ಜಾಂವ್,
ತುಜೆಂ ರಾಜ್ ಯೇಂವ್,
ತುಜಿ ಖುಶಿ ಸರ್ಗಾರ್ ಜಾತಾ
ತಶಿ ಸಂಸಾರಾಂತ್ ಜಾಂವ್.

ಅಮ್ಚೊ ದಿಸ್ಪೊಡ್ತೊ ಗ್ರಾಸ್,
ಆಜ್ ಅಮ್ಕಾಂ ದೀ, 

ಅನಿಂ ಅಮ್ಚೇರ್ ಚುಕ್ಲೆಲ್ಯಾಂಕ್
ಭೊಗ್ಶಿತಾಂವ್ ತಶೆಂ ಅಮ್ಚಿಂ
ಪಾತ್ಕಾಂ ಭೊಗೊಸ್.
ಅನಿಂ ಅಮ್ಕಾಂ ತಾಳ್ಣೆಂತ್ ಪೊಡೊಂಕ್
ದೀವ್ನಾಕಾ.ಪೂಣ್ ವಾಯ್ಟಾಚಾ
ಹಾತಾಂತ್ಲೆ ಅಮ್ಕಾಂ ನಿವಾರ್. (ಮಾತೆವ್ 6:9-13).

ಉಪ್ರಾಂತ್ ಅಮಿಂ ಮ್ಹುಣ್ತಾಂವ್ ನಮಾನ್ ಮರಿಯೆ.

ನಮಾನ್, ಮರಿಯೇ ಕುರ್ಪೆನ್ ಭರ್ಲೆಲೆ,

ಸರ್ವೇಸ್ಪರ್ ತುಜೆ ಸಾಂಗಾತಾ ಅಸಾ, (ಲೂಕ್ 1:28)
ಸ್ತ್ರಿಯಾಂ ಭಿತರ್ ತುಂ ಸದೆಂವ್,
ಅನಿಂ ಸದೆಂವ್ ತುಜಾ ಕುಶಿಚೆ ಫಳ್ ಜೆಜು. (ಲೂಕ್  1:42).

ದೇವ್ ದೂತಾನ್ ಸಯ್ತ್ ತಿಕಾ ನಮಾನ್ ಕೆಲಾ ಅನಿಂ ಎಲಿಜಾಬೆತಿನ್ ಮರಿಯೆಕ್ ಮ್ಹುಳಾಂ, "ಸ್ತ್ರಿಯಾಂ ಭಿತರ್ ತುಂ ಸದೆಂವ್,

ಅನಿಂ ಸದೆಂವ್ ತುಜಾ ಕುಶಿಚೆ ಫಳ್ ".

ಉಪ್ರಾಂತ್ ಮ್ಹುಣ್ತಾಂವ್ ಭಾಗೆವಂತ್ ಮರಿಯೆ,

ಭಾಗೆವಂತ್ ಮರಿಯೆ, ಸೊಮಿಯಾಚೆ ಮಾಯೆ, (ಲೂಕ್ 1:43)
ಅಮಾ ಪಾಸೊನ್ ವಿನತಿ ಕರ್, ಅತಾಂ ಅನಿಂ

ಅಮ್ಚಾ ಮೊರ್ನಾಂಚಾ ವೆಳಾರ್ ಅಮೆನ್. (ಜಾಕೊಬಾಚೆ ಪತ್ರ್ 5:16)

ಎಲಿಜಾಬೆತ್ ಮ್ಹುಣ್ತಾ ಮರಿಯೆಕ್ ಸೊಮಿಯಾಂಚಿ ಅವಯ್, ಅಮಿಂ ತೆಂಚ್ ಉಲೊ ಮಾರ್ತಾಂವ್. ಜಾಕೊಬಾಚಾ ಪತ್ರಾಂತ್ ಬರಯ್ಲ್ಯಾ ಪ್ರಕಾರ್ ಅಮಿಂ ಮರಿಯೆ ಕಡೆನ್ ವಿನಂತಿ ಕರ್ನ್ ಮ್ಹುಣ್ತಾಂವ್, ಅಮಾ ಪಾಸೊನ್ ವಿನತಿ ಕರ್, ಅತಾಂ ಅನಿಂ ಅಮ್ಚಾ ಮೊರ್ನಾಂಚಾ ವೆಳಾರ್ ಅಮೆನ್.

ಮಹಿಮಾ ಬಾಪಾಕ್, ಅನಿಂ ಪುತಾಕ್ ಅನಿಂ ಅತ್ಮ್ಯಾಕ್,  (ಜುದಾಚೆ ಪತ್ರ್ 1:25, ಅ.ಕ್ರ 5:3-4, 2 ಕೊರಿಂಥ್ 13:13)
ಜಶಿ ಅಧಿಂ ತಶಿ ಅತಾಂ ಅನಿಂ ಸದಾಂ ಸರ್ವಾದಾ ಅಮೆನ್ - (ಜುದಾಚೆ ಪತ್ರ್ 1:25)

ಜುದಾಚಾ ಪತ್ರಾಂತ್ ಬರವ್ನ್ ಅಸ್ಲೆ ಪ್ರಕಾರ್ ದೆವಾಕ್ ತಾಚ್ಯಾ ಪುತಾ ಮರಿಫಾತ್ ಜಾಂವ್ ಮಹಿಮಾ ಅದಿಂ, ಅತಾಂ ಅನಿಂ ಸರ್ವಾದಾ ಅಮೆನ್.

--------------------------------------------------------------------------------------------------------------------------------

-ವಿವೇಕ್ ಮೊಂತೇರೊ, ಕೆಲರಾಯ್.